UPDATE

Bèste Vastelaovesvierders,

Veer höbbe ein aantal leuke Vastelaovesactiviteite bedach, es alternatief veur de activiteite die helaas neet door kinne gaon i.v.m. de Coronamaotregele. Veer zitte es Vastelaovesvereniging dus zeker neet sjtil!
Zo zal tössje noe en de Vastelaovend de optochroute versierd waere en zeen veer bezig mit ‘t oetwirke van ein Vastelaoveswanjeling veur jóngk en aad. Os Vastelaovesgazèt “’t Wasjwief” zal weer hoes aan hoes verkoch waere (De gazet is gratis veur leeje van de Berggeite, ein per hoesadres. Veur neet-leeje is de gazet te koup veur €4). Ouch zal eder lid van de Berggeite ein leuke verrassing van ós ontvange, mer det blief nog efkes geheim.

Achter de sjerme wèrke veer aan nog ein aantal ideeje om d’r veur te zorge det veer mit zien alle zoväöl meugelijk Vastelaovend kinne viere in Berg, passend binne de geldende maotregele.

Natuurlijk haope veer det binnekort weer méér meugelijk is, veer haaje uch op de heugte van eventuele nuuje planne.Wilt geer ouch sjteunend lid waere van CV de Berggeite? Dit kin veur sjlechts €11 per jaor. Geer kint uch aanmelde via secretaris@cvdeberggeite.nl.

Same haaje veer de Vastelaovend in Berg laevend!

Vastelaovesgroete, CV de Berggeite