Optoch
Bèste Vastelaovesvierders,
Dit jaor geine optoch door de sjtraote van Berg, helaas. Wat veer waal organisere is eine digitale miniatuuroptoch. Eine optoch veur alle laeftieje wo detse ein optoch-ongerdeil in miniatuur presenteers.
Wie geit dit in zien werk?
- Doe sjriefs dich in veur 22 januari 2021 via ongersjtaond insjriefformulier.
- Doe ontvings ein pakketje van òs mit onger angere ein A3 vel wo dien creatie op gemaak moog waere maar in ilk geval op mot passe. De creatie moog dus neet groter zeen dan dit A3 vel.
- Daobiej ontvingse ouch ’t REGLEMENT.
- Doe levers dien creatie veur 1 februari 2021 in biej de organisatie zodet veer de optoch in beeld kinne bringe.
Alle creaties waere veur de vastelaovend weer netjes biej uch truuk bezorgd. De optoch waert es video oetgezonje via de facebook-pagina van CV de Berggeite op vastelaoveszonjig 14 fibberwari om 14.11 oer.
Biej ’t make van dien creatie zijn alle materiale toegesjtaon, dink aan; sjoondoze, hout, metaal, sjtof, naold en draod. Maar ouch sjpeelgood wie lego of duplo is toegesjtaon. Kortom, eine optoch wo idderein van jonk toet aad aan deil kin numme!
De optoch waer georganiseerd door CV de Berggeite in samenwirking mit Stichting Jeugdraad.
